Ballade pour prier Nostre Dame de François Villon,
attribuée à sa maman dont on ne connait pas le nom :
Dame du ciel, regente terrïenne,
Emperiere des infernaulx paluz,
Recevez moy, vostre humble crestïenne,
Que comprinse soye entre vos esleuz,
Ce non obstant qu’oncques rien ne valuz.
Les biens de vous, ma dame, ma maistresse,
Sont trop plus grans que ne suis pecheresse,
Sans lesquelz biens ame ne peult merir
N’avoir les cieulx ; je n’en suis jangleresse :
En ceste foy je vueil vivre et mourir.
A vostre Filz dictes que je suis scienne ;
De luy soient mes pechiez aboluz.
Pardonne moy comme a l’Egipcïenne,
Ou comme il fist au clerc Theophiluz,
Lequel par vous fut quicte et absoluz,
Combien qu’il eust au deable fait promesse.
Preservez moy que ne face jamaiz ce,
Vierge portant, sans rompture encourir,
Le sacrement c’on celebre a la messe :
En ceste foy je vueil vivre et mourir.
Femme je suis povrecte et ancïenne,
Qui riens ne sçay, oncques lettres ne leuz.
Au moustier voy, dont suis paroissïenne,
Paradiz paint, ou sont harpes et leuz,
Et ung enffer, ou dampnez sont bouluz ;
L’ung me fait paour, l’autre joye et lïesse.
La joye avoir me fait, haulte deesse,
A qui pecheurs doivent tous recourir,
Comblés de foy, sans faincte ne parresse :
En ceste foy je vueil vivre et mourir.
Vous portastes, digne Vierge, princesse,
Jheusus regnant qui n’a ne fin ne cesse.
Le Tout Puissant, prenant nostre foiblesse,
Laissa les cieulx et nous vint secourir,
Offrit a mort sa tres clere jeunesse.
Nostre Seigneur tel est, tel le confesse :
En ceste foy je veul vivre et mourir.
